Lo realizator Christopher Thomson reçaubèt naturalament aquels compliments emb glòria e gaug. Cal dire que portava en el lo somi de fargar aquela seria dempuèi qu’aviá legit jovent los tretze romans de Robèrt Merle, que compausan la saga "Fortune de France".
Actor, scenarista, realizator, son experiéncia dins lo mitan del cinèma li a permés de recampar una còla ideala, al servici d'aquel projèct intime e universal. Es Tierrí Bordes, responsable del burèu d’acuèlh dels filmatges en Perigòrd** que guidet Christopher Thomson e Joan Cottin per que poguèssen far en Perigòrd de las localisacions decisivas a la tardor de 2022. Coma l’explica lo realizator :
"Avem descobèrt laidonc belcòp d'aquels sitis que ressonavan dins mon imaginari emb tot çò qu'aviái en vista a la lectura dels libres de Robèrt Merle. Avèm fargat nòstra istòria a l'entorn d'aquels blòts : los Castèls de Fenelon, de Bainac, de las Bòrias e de Biron. Voliam ancorar nòstres actors dins una realitat. Podián atal cargar los costumes de lors ròtles e viure dins los decòrs de lors ròtles."
Realizator e productor an a la seguida d'aquelas localisations fèrmament defendut lor volontat de trabalhar en decòrs naturals.
"Desplaçar una equipa, la noirir, l'albergar, es mai car que de trabalhar en estudiò sus un fons verd***. Èra lo prètz a pagar per qu'aquela istòria que se debana al sègle XVIen prenga vertadièrament còrs al travèrs dels endrechs e dels personatges". Es vertat qu'aquò càmbia tot d'èsser entaulat a costat d'un fuòc brandal de chaminèia de castèl per balhar la replica.
E tots dos de contunhar :
"Nòstre desir ara es qu'aquela istòria franco-perigòrda viatje. Las istòrias las mai intimas interessan la màger part. En agachant la França d'aièr, se pòt parlar de la França de uèi. I a efectivament nombrós parallels entre aquelas doas pontannadas : l’epidèmia de pèsta e la pandemia de Covid, la revolucion de Gutenberg (estampariá) e la revolution numerica (Internet), l’emancipacion de las femnas totjorn a la pena a l'ora d'ara, l’intolerància religiosa que se tiba menant tornarmai a s’entre-tuar al nom de Dieu."
"Fortune de France" nos mèna tanben a nos pausar la question sus çò que en cadun de nosautres es ambivalent. Lo Cavalièr de Sieurac, medecin, umanista, cercant a aver un metòde scientific, rasonat, se mòstra per tant intolerant en impausant sa religion reformada a sa familha e a son monde. La guèrra de Religion se transforma per consequent en guèrra domestica. L’infèrn es resolgudament pavat de bonas intencions.
E se per aver la patz arrestàvem de se contar d'istòrias d’origina ?
Per anar mai lonh : la question de l’origina es pas dins lo fons una fòrt marrida question ? Escambis a l'entorn del film "La naissance de la Préhistoire" de Sofia Cattoire.
https://www.tardiglobe.info/l-origine-existe-t-elle.html
*Los uganauds son los protestants del reialme de França e del reialme de Navarra al moment de las guèrras de Religion de la segonda mitat del sègle XVIen (1562-1598), d'aquel temps fuguèron — jos quel nom — en conflicte emb los catolics.
**Lo Burèu d’acuèlh dels filmatges de la Dordonha es un servici de l’associacion Ciné-Passion en Perigòrd, dedicat als professionals del cinèma. A per mission de favorizar l’arribada dels filmatges sul departament, en acompanhant las produccions dins lors cercas de decòr, puèi dins totas las etapas de lor filmatge, de la preparacion (tecnicians, comedians, figurants, prestataris…) a la difusion, en collaboracion estrecha emb lo fons de sosten a la produccion del Conselh Departamental de Dordonha.
***Lo principi d'un estudiò fons verd consistís a filmar un actor o un objècte vertadièr davant una tela al fons verd, puèi a utilizar un logicial de tractament d'image per remplaçar la tela verda per un decòr virtual o un element numeric.
Sofia Cattoire
Jornalista grand reporter
FERRASSIE TV
Revirada en occitan : Joan-Claudi Dugros majoral del Felibrige e corrector al Collègi d’Occitania de Tolosa.
