|
Dins la granda tradicion de las societats secrètas – Ròsa-Crotz, Òrdre dels Templièrs
– la Frairiá de las Mongetas Codena practican dins l’ombra dempuèi sas originas.
Quò’s queraque çò que li a permés de subreviure e d’intrar de plan pè dins lo sègle
XXen, totjorn en secret. Aqueste estiu, tot-parier, avèm pogut assistir a l’adobament
de dos novèls Chivalièrs, passats de segur mèstres dins l’aprestatge de las mongetas
codena, mas versemblablament dotats d’autres talents, amagats ‘quels d’aquí, e justifiant
plènament aquela reconeissença de sos pars.
Gilbèrt Gensou, 83 ans, e Gilbèrt Delteil, 81 ans, fuguèrent laidonc, ‘quel 6 d’agost
2006, sacrats Chivalièrs de la Frairiá de las Mongetas Codena de Paunat, non sens
èstre estat per abans revestits del ajust que conven, dins una suaudor religiosa
e au son d’una messa estranha entonada per Jacques Saraben, oficialament artista
paunatés distinguat, oficiosament, l’un dels nauts dignitaris d’aquel milenari movement.
L’un dels teoricians d’aquela Frairiá, Raols Silvert, secretari dels Amics de Paunat,
faguèt puèi lectura d’una tèsi a tiretas. Aparentament l’istoric de la mongeta tras
los atges e los continents. Mai versemblablament, lo raconte eimajat de las fortunas
e infortunas legendàrias dels « Fraires de Codena », coma s’apelan entre els. Per
çò qu’es del « Paire de Codena », leader del movement, Rogièr Chapotot, mera de
Paunat, balhèt puèi, e totjorn dins un lengatge ermetic als neofits, lectura dels
dètz comandaments, charpenta filofosofica d’aquel òrdre poderós.
Gilbertus Premius e Gilbertus Secundus, parats emb de las aubas somptuosas confeccionadas
per l’escasença e, coma zo vòl la tradicion, per las castas mans de las Sòrres Andriva
Vignal e Elena Gensou, faguèron d’un cap a l’autre de la ceremonia semblant d’èstre
estonats. ‘Quò era una rusa plan segur, destinada a la camerà. Sapchatz, monsurs
los Chivalièrs que nos daisserem pas enganar. Vòstra intronisacion fuguèt lo coronament
d’una practica que vos i vodatz dempuèi fòrt longtemps – l’aprestatge de las mongetas
codena – ont deu ben intrar quauqua magia, si que non, coma una tant petita comuna
trairiá tant de monde autorn de vòstre fumant pairòl ?
|
