L'art, passapòrt postum de l'òme preïstoric

Lo camin fuguèt long per pus legir a la letra los mites fondators e començar a inscriure l'istòria dels òmes dins una concreta temporalitat : lor Preïstòria. E se son los esplechs puèi los òsses que demostrèron progressivament l'existéncia d'òmes preïstorics, aquò's per bona part l'art que permetèt son acceptacion al mitan del sègle XIXⁿ. D'aquel punt de vista, l'art mobiliari balhat al periòde dit magdalenian, 15000 a 12000 B.P. (Before Present), fuguèt determinant. L'exposicion temporària "Grands sites d'art magdalenian, La Magdalena e Laugeriá-Bassa i a 15000 ans" acampa un inventari tot plen excepcional d'aquel art d'una granda finesa, visibla juscas al 10 de novembre al Musèu nacional de Preïstòria de Las Aisiás e al Musèu d'art e d'arqueologia de Perigòrd a Perigüers.

Lo mamot que veguèt l'òme

Las mèstras pèças de la colleccion recampada per Enric Christy e Audoard Lartet dins la val de Vesera a partir de 1863 son per l'escasença de retorn al breç, gràcia al Musèu nacional d'arqueologia de Saint-Germain-en-Laye e al British Museum de Londres que an lor conservacion en carga. Entau, lo delicat mamot lanut escalprat sus la celèbra placa en evòri es presentat a Las Aisiás, pas luènh del jaç de La Magdalena, situat a Tursac, ont èra estada descobèrta en 1864 per Christy e Lartet.

Aquela pèça fuguèt essenciala comparat a l'evolucion de las mentalitats car se la subcontemporaneïtat del òmes e de las bèstias desaparegudas fasiá enquera debat, fuguèt clar per tots, davant aquela gravadura, que l'òme aviá bèl e ben vist lo mamot. Entau aquel mamot avaliguèt los dobtes, un bon còp per tots. E aquel art portèt lo nom de "magdalenian" en omenatge al site ont fuguèt d'en prumièr descobèrt e reconegut.

Un fum d'autres tresaurs tant esbleugissents son expausats d'un biais temporari a Perigüers e a Las Aisiás e meritan plan largament que prengam lo temps d'anar los observar de près. Aquelas presas de l'imaginari de nòstres aujòls que visquèron a la fin de la darrièra pontannada glaciala nos permeton d'entrar d'un biais privilegiat dins lor univèrs.

Lo catalòg de l'exposicion pòrta en complement de contribucions scientificas essencialas, rebat de nòstra compreension actuala d'aquela civilisacion.

Sofia Cattoire

Aquela exposicion es organizada per la Rmn-Grand Palais e lo Musèu nacional de Preïstòria (Las Aisiás de Taiac), emb la collaboracion scientifica del Centre nacional de Preïstòria (Perigüers) e del Musèu d'art e d'arqueologia de Perigòrd (Perigüers).

Comissariat :

Peggy Bonnet-Jacquement, Tecnician de recèrca, Musèu nacional de Preïstòria, Las Aisiás de Taiac
Joan-Jaume Cleyet-Merle, Conservator general del Patrimòni, Director del Musèu nacional de Preïstòria, Las Aisiás de Taiac
Joan-Miquel Geneste, Conservator general del Patrimòni, Director del Centre nacional de Preïstòria, Perigüers
Elena Man-Estier, Conservatritz del Patrimòni, Centre nacional de Preïstòria, Perigüers
Veronica Merlin-Anglade, Conservatritz en chefe del Patrimòni, Directritz del Musèu d’art e d’arqueologia de Perigòrd, Perigüers