|
Davant una equipa anonciada coma redobtabla, primièra de la pola e invencida, los d’Albuga son entrats sus lo prat prèstes fisicament e amb un mental d'acièr. Tre las primièras minutas Yacine Ouali empòrta tots sos companhs del pack avant sus una bona quarantena de mètres, balhant atal lo ton a un rencontre onte veirem una superioritat vertadièra dels locals, davant, tant dins l'engatjament fisic coma dins la conquista. Logicament, Antòni Vasquez dobrís la marca sus penalitat aprèp fauta al sòl del monde d’Òlt. Mas qualquas minutas pus tard, quels d’aquí, reagissent en permanéncia emb de grandas envoladas de lors ¾, una granda vivacitat, de passas sautadas e una perfècta adreça sus lo balon, egalisan sus una penalitat reüssida per lor excellent canonièr Chassagnac.
LA REMONTADA FANTASTICA D'ANTÒNI VASQUEZ
Çò melhor de la partida, Antòni Vasquez vai laidonc nos l'ofrir : sentent lo còp sus una enièma envolada dels ¾ advèrses, intercèpta la darrèra passa sus lo bòrd de la tòca, dins sos 22 mètres e remonta tot lo terren sus 80 mètres, tota la jova defense gordonèsa darrèr el, pour anar marcar au mitan de las pagèlas. Damien Marty, tot prèp, serà lo primièr a lo gratificar emb un gèste d'amistat e de glòria. Antòni Vasquez transfòrma l'ensag e tòrna començar sus una penalitat qualquas minutas pus tard, sus una novèla error dels jogaires d’Òlt.
Los d’Albuga asseguran al cors d’aquel primièr acte una conquista extrèmament prolifica, en tòca mai que mai, amb Ludovic Croiset e Sacha Fisher, e amb los balons portats per un cinc de davant monstruós ; Yacine Ouali e Bernat Fakaté balhant un jòc enòrme al cors d’aquelas primièras 40 minutas.
LA FURIÀ FINALA DELS CHIVALIÈRS D'ALBUGA
Lo segond acte va aparéisser demasiadament estressant, paradoxalament, malgrat una dominacion territoriala dels Blus e Blancs aclapanta au mens 30 minutas de temps. Qualquas petitas errors dins lo jòc o arbitralas interdisent la concretisacion de temps de jòc interessants, d'un costat coma de l'autre, e la granda qualitat del grop visitor que, de cap en cima, barrarà jamai lo jòc, fai montar los enquants. Aquò’s atal que quels d’aquí replican a doas novèlas penalitats de Vasquez per un ensag transformat de lor capitani e un còp franc de 50 mètres, ogiva expediada aprèp fauta al sòl dels d’Albuga.
Resultat : a la darrèra minuta de jòc efectiu, las doas equipas se retrobèran a egalitat, 16 pertot … Lo suspense es comol, demòra 4 minutas d'arrèst de jòc indicadas per l'arbitre. La furià locala vai laidonc se concretisar jos las pagèlas aprèp un enòrme balon portat ont los 8 avants, e mai que mai Yacine Ouali, empòrtan Bernat Fakaté per l'ensag de la ganha.
Demòra enquera doas minutas, juste lo temps per Maxim Chalon de se far la mala darrèr la mesclada seguenta e de servir, aprèp un corsa de 50 mètres, un caviar a Damien Marty que anirà fièrament aplatir lo tresen ensag d'Albuga. Atal, los Blus s'impòsan dins lor casal, un novèl còp, contra un dels gròs braç de la pola.
PLB
|
