VICTÒRIA D’ALBUGA FÀCIA AL PRUMIÈR DEL GROPAMENT D’EQUIPAS

ALBUGA-LANNEMEZAN
9 de novembre 2008, estadi Renaud Cruveiller
Marca : 29 a 23

Plan segur, mai òm monta, mai òm s’apròpcha dels professionals, mai lo rugbí ven de grand art, sens dificultat, sens bagarras. Mas tot-parier… la valsa dels cauçons e lo largatge de castanhas arriban enquera, subreptiçament a se dobrir un passatge quand los òmes fatigan e que la tension monta. Per tot dire, èra temps qu’aquò s’acabèsse ièr sul prat d’Albuga, onte, fàcia al prumièr del gropament d’equipas, Lannemezan, los Chivaliers d'Albuga capitèron jusca a la darrièra minuta a pas desarmar.

L'aventura prodigiosa dels campanhards que engulhan las montadas e las victòrias en segre : Onor, Federala 3, Federala 2 e Federala 1 ara, contunha fàcia als gròs calibres de la flor dels amators, amb un grope largament renovelat mas totjorn lo mème esperit familial, tintat d'eroïsme e de fraternitat. Car se cada blassat es quasiment una pèrda seca, per çò que lo club a pas tots los joquèrs necessaris, en contrapartida lo clan sap que de tot biais deu batre a l'unisson fàcia a l'adversari :

« Avem reüssit una fòrt bona integracion dels novèls jogaires en conservant l'esperit d’Albuga qu’es nòstra glòria e nòstra fòrça » çò-ditz Yohan Magnol, tresena linha d’Albuga que a viscut la fulguranta ascension de l’equipa e saborat son titre de campion de França en Federala 3, lo 10 de junh 2007.

Aquò’s una aventura que tot lo grope viu a fons, sostengut per de novèls entraïnaires : Xavièr Blond, l'entraïnaire general, ancian tresena linha internacional que fuguèt campion de França amb lo Racing Club de França e l’Estadi francés, Joan-Francés Thiot, entraïnaire de las linhas de darrièr, ancian jogaire professional de Brive e l’un dels melhors jogaires cargat de marcar, francés, e enfin Aïssa Gacem, preparator fisic que a en particular longtemps preparat l'equipa de rugbí a XIII de Vilanuòva d’Òlt.

Per çò qu’es dels jogaires, l'equipa d’Albuga compta d’ara enavant pas mens de quatre internacionals dins sos rengs : lo segonda linha Sacha Fisher, internacional alemand, que fasiá dejà partida de la granda aventura, mai, aurá, lo prumièra linha David Gasviany, internacional georgian, lo 3/4 centre Terry Fanuola, internacional originari de las islas Samoa e lo jogaire cargat de marcar los còps de pè Ionut Tofan, internacional romanés.

Gràcia a lor victòria a domicili fàcia a Lannemezan aquel dimenge 9 de novembre 2008, los d’Albuga se mantenon dins los quatre primièrs de lor Gropament d’equipas en Federala 1. Enquera uèit partidas per confirmar aquela brava traucada sul lindal del rugbí professional. Aquò s’èra jamai vist per un vilatge de 2500 armas que jòga donc aquesta sason al mèma nivèl que Perigüers, la prefectura ! Mas pas dins lo mèma gropament d’equipas per çò que, vertadièrament, los cauçons garnits amb de castanhas, aquò’s pas bon.

Sofia Cattoire

Lo resumit de la partida per nòstre confraire PLB :

Aprèp un primièr temps de tota beutat al cors de laquala los d’Albuga dintran tres ensags, amb l'internacional Terry Fanuola a la bagueta e una gròssa conquista dels avants, los Blus menavan largament a la pausa fàcia a la gròssa cilindrada del Gropament d’equipas : l'equipa de Lannemezan, classada primièra e qu’aviá jusca aurá perdut nonmàs una partida fàcia a Langon.

Lo jòc al sòl de Lannemezan extrèmament eficaç a provat que sa posicion de primièr èra vertadièrament pas usurpada. Se los d’Albuga se son trobats a un moment donat, amb tres ensags d'avança, en posicion de ganhar lo bonús ofensiu, los visitors an pas mancat de tornar botar las pendulas a l'ora amb un jòc coerent e monolitic dels avants que coneisson manifestament nonmàs una nocion matematica : la linha drecha. Lo platèu dels Pirenèus deu i èsser per qualque res. Tot parier los d’Albuga, amb una defensa extrèmament sòudada, solidària e ben organisada, faguèron front jusca a la darrièra minuta e encaissan los 4 punts de la victòria que seràn preciós al moment del classament final del Gropament d’equipas.

PLB