COMA UN VÒL DE DOMAISÈLAS BLÚIAS... CARNASSIÈRAS

Aquò’s segur ! Se’n sovendràn longtemps las galinetas rojas de Castèlsarrasin de lor passejada al país de las domaisèlas blúias… Dins una fòrma vertadièrament espaventabla e amb qualquaren d’una esquadrilha de caça, l’equipa d’Albuga a mitralhat una seria d’encadènaments a vos copar lo buf per s’envolar darrièr la linha d’en but sièis còps en seguida, daissant l’equipa dels visitors rabiosa mas moqueta. Los d’Albuga tòrnan laidonc, aprèp aquel dimenge memorable, primièrs de lor gropament d’equipa, jos los cants e los orràs de bonaür dels partisans.
Una centena de fotòs restituisson aquela granda partida, relatada minuta per minuta per nòstre eminent confrair PLB.

Sofia Cattoire

Albuga :
6 ensags : Latapie (22°), Castanetto (34°), Marty (41°), Fakaté (50°), Magnol (56°), Fakaté (64°).
5 transformacions : Bourgeois (22°, 34°,41°, 50°, 56°)
4 penalitats : Bourgeois (3°, 17°, 26°) Vasquez (79°)

Castèlsarrasin :
1 ensag : Filippa (46°).
1 transformacion : Barthélémy (46°).
4 penalitats : Barthélémy (5°, 7°, 37°, 44°).

Lo resumit de la partida per nòstre confrair PLB :

Aquel dimenge 16 de març de 2008 nos a incontestablament ofèrt una de las partidas las mai interessantas de la sason entre doas bravas equipas al complet, sus la pelena umida del estadi Renaud Cruveiller.
Avèm vist d’en primièr Castèlsarrasin envoiar de jòc pendent tot lo primièr temps, malgrat una bona conquista locala que menèt tot-parier de las fautas e balhèt atal al formidable canonièr Tarn-e-Garonés Barthélémy l’ocasion d’engranjar de punts sus penalitats los uns aprèp los autres.
Atal fauguèt esperar vint bonas minutas avant de veire los d’Albuga passar davant a la marca, contra lo vent, aprèp un ensag de Latapie sus un gropat penetrant portat sus una vintena de mètres.
Mas la victòria èra luènh d’èsser tenguda per segura e fauguet cravachar e botar de jòc en plaça per çò que l’equipa de Castèlsarrasin envoiava de jòc a cada ocasion per son obreire Barthélémy e sa linha de 3/4 extrèmament velòça.
A fòrça de botar de jòc en plaça, amb una gròssa conquista davant en tòca e pas mal de balons portats coma cal, los d’Albuga acumulèron cinc novèls ensags : Castanetto (34°), Marty (41°), Fakaté (50°), Magnol (56°) e enquera Fakaté (64°), aprèp de subrebèls encadènaments partits sovent de plan luènh.
Sortirèm de tot aquò l’ensag de la debuta del segond acte quand Yohan Magnol recupèra un balon de volada e trauca, amb la vitessa e la finessa qu’òm li coneis, tota la defensa advèrsa per servir sus un platèu Damian Marty que fila a l’ensag.
Francés Bourgeois, cargat dels còps de pè per Albuga, faguèt el tanben un plan bon trabalh, tant sus las penalitats coma sus las transformacions.
L’ensag de Castèlsarrasin venguèt a la 46°minuta aprèp una error de jutjament de la defensa locala que permetèt a l’alièr visitor Filippa de remontar tot lo terren per anar aplatir dins l’angle e tornar balhar qualquas esperanças a sos coequipièrs.
En resumit, malgrat una pluèja amb de ramadas, avèm assistit jusca a la darrièra minuta a una gròssa partida de segonda division.
Albuga tòrna passar primièr amb un punt d’avança sus Gordon qu’es anat pèrdre aquel dimenge chas l’un dels darnièrs del gropament d’equipa : Malamòrt.

PLB