A ! LOS BRAVES DIMENGES !

Qualificats directament per los 32en – los primièrs e segonds de cada pola passan a gratís lor torn dels 64en – afrontan Hendaye, sul terren maudit de Basats (fr. Bazas) onte los d’Albuga avián pas jamai ganhat en fasas finalas. Fuguèt enfin fait, aprèp un rescontre viu, onte lo grope, aprèp une impassa de mai d'un mes sens jogar, tornèt trobar progressivament son jòc (20 a 12).

En 16en, autre terraire amb los Lionés de Meyzieu. Los d’Albuga començan a tornar botar lor rugbí en plaça. Dins lo subrebèl estadi de Bòrt, los suporters blu-e-blanc venguts amassa, van tot-parier aver qualque esglasi a causa subretot de la darrièra penalitat lionesa que capitarà pas a l'ultima minuta del rescontre e que auriá pogut far bascular la resulta de la partida (11 a 10).

En 8en, retorn vèrs lo Sud amb la patria de Molière, Pesenàs, jogat entre los terrils de La Sala (fr. Decazeville). Gròs bocin, tant las equipas d’aquel costat de la Mediterranèa son redobtablas. Lorda intensitat e marca estrechida, mas victòria amb un nivèl de jòc que monta de dimenge en dimenge (20 a 18).

Rebelòta en 1/4 de finala per una oposicion amb lo Rosselhon (fr. Roussillon) e los guerrièrs de Thuir, a Castanet-Tolosan. Banlèga de Perpinhan, naut-luòc del rugbí, aquò s'anonciava del mai delicat. Aprèp un rescontre de naut nivèl, subretot una fin de segond acte onte los blu-e-blanc an recitat lor gamma per la conservacion del balon, quels d’aquí l'emportan 25 a 23 e se propulsan en mièja-finala.

E en mièja, coma ren serà esparnhat a los d’Albuga, tornaràn afrontar una gròssa puntura del Sud-Oest, los Landés de Mugron, a Langon. Sens dobte lo mai bel imatge que se gardarà dempuèi la debuta d’aquelas fasas finalas: un fum de monde, un temps subrebèl, de bandàs e de colors, un jòc d’Albuga retrobat e acabat d'una excellenta tenguda, un adversari tinhós, arrapaire e plan dins la tradicion de son rugbí de país. Fin finala, lo monde d’Albuga se propulsan en finala del Campionat de França de Tresena Division, per lo primièr còp de lor Istòria, sus la marca de 23 a 6.

P.L.B