REVELHA LO SUPER ERÒI EN TU
Tot es previst : levar a la cliqueta, desjunar balès, casco, bossòla, pompa
de bicicleta, lampa frontala, resèrva d'aiga e l'arma fatala : l’estilò, si
sovent introbable. Los glòbs-trotaires del Raid pòdon laidonc èsser largats en Perigòrd
- Porpra, Blanc, Negre o Verd, aquò cambia tots los ans - e salva-qui-pòsca !
Lo descompte despietadós es lançat. S'enseguís cinc jorns de folia ont faudrà, torn
a torn e sens jamai frenar, cabussar al fons de las cròsas, de las falhas e de las
cavitats, de còps que i a dins l'aiga glaçada, davalar del naut d'una faciada medievala
penjat a una tirolesa, faiçon Tarzan, far l'òme-aranha sus un grand filat gitat
autorn del castèl de Mont Basalhac, patolhar dins los banhs de fanga preferits dels
tessons e tot aquò per ensajar de trobar un vestigi de la mai nauta Antiquitat,
emblèma de la deessa de las mestivas e de la fertilitat, la legendària Podadoira
d'Aimet, tenguda dins un endrech secret e sacrat.
VÈNUS, CRONÒS E PAQUITÒ
Pas forçadament conscient de la crida de Vènus, deessa dels jardins e de l'amor,
mas concrètament butits pel tiranic Kronòs, diu del Temps, nòstres cent cinquanta
« raiders » meneron sens trigar lor quista jos cada pè de vinha del Sud
del Brageiraqués e aquò’s fin finala una equipa venguda de Sòrges, lo país de la
trufa, que capitarà de desnisar, dins un final grandàs e apassionant, la famosa
Podadoira sebelida dins un abric jos ròca dominant la val del Dròt. Al final, lo
coratge e lo vam de tots seràn recompensats dins la jòia comunicativa de la benda
« Ré d'Urgence » d'Aimet que entonarà per tota la tropa un « Paquitò »
memorable ont cadun aganirà sas darrièras fòrças a volontat. La segonda d'aprèp,
tot s’avalís : tendas, refectòri, bicicletas, canoès, e tota la tribú arcolan,
irange, ròsa e verda, dels acompanhaires e organisators. Lo vilatge dels lòtjaments
del « Breton » tòrna trobar en una clinhada un calme olimpian tot plen
desconcertant e l'òm demòra triste e sens votz, coma quand òm regarda passar los
ausèls migradors en somiar de lor Sud e en crénher nòstre ivern.
LO FILM DEL RAID : 45 minutas de folia a tornar viure intensament
Tot-parier, tot fuguèt vertadièr e filmat e FERRASSIE-TV es urosa de vos rapelar
que, coma l'an passat, lo film del Perigòrd Raid Aventura es gratuitament telecargable
en quatre episòdis sul
siti Internet del Conselh General de la Dordonha. E per los que voldrián
aver lo DVD collector en nauta resolucion per projèctar lo film del Raid sus lor
« home cinemà » o sus lor television e far partatjar, als amics, als parents,
aquel ondada de grands moments, podètz lo comandar aicí, nos farem un
plaser de vos lo mandar.
Sofia Cattoire
|
