ENFIN LO GRAND FILM DEL RAID 2010 A MOISSÍDAN !

Aprèp Milhac de Nontronh, Montinhac-Las Caus, La Linda, Tortoirac, Nuòu Vic, La Ròca de Gajac, Ajac de Bandiat, Cujac, Rofiac, Albuga e Aimet, traversadas de 1999 a 2009, lo Perigòrd Raid Aventura a fait estapa en agost 2010 a Moissídan. Coma cada còp, fuguèt la fèsta de l’espòrt e de l'amistat. De notar aquesta annada, d’equipas particularament ben preparadas e un circuit de raibe, del castèl de Montreal a Issac al musèu Voulgre de Moissídan, en passar per Sorzac, Sent Front de Pradon, Sent-Laurenç daus Urmes e Sent Meard de Moissídan. En plena corsa, en VTT, en « trail » o en canoè, 250 joines de 14 a 16 ans auràn agut de visions susprenentas coma aquela necropòli merovingiana mesa al jorn per l'INRAP a Sent Laurenç daus Urmes o enquera las subrebèlas esclusas de Sent Meard de Moissídan e de Benevent. Lo temps d'un Raid en plena natura, Moissídan retrobava sa supèrbia de pòrt fluvial prospèr, d'onte las gabarras cargadas a fons lisavan lo long de l'Isla jusca a Liborna o Bordèu.

Per far lo pes davant tant de bravas causas e per benastrugar tots los que fan aquel Raid viu, publicam sus www.albuga.info mai de 600 fotòs per fin que cadun s'i retròbe. E puèi per çò qu’es del reportatge, FERRASSIE TV a botat las bocadas doblas aquesta annada en passant dins la dimension HD. D'un cap a l'autre, lo Raid 2010 fuguèt filmat en Nauta Definicion e lo film produsit. Resultat : de vertadièr cinemà ! Podètz aicí passar comanda del Disc Blu-ray o del DVD Grand ecran 16:9 – Master HD per far partejar a tots aquela formidabla aventura.

Sofia Cattoire