|
Quò es, coma tots los estius, de la grana d'aventurièrs que lo Perigòrd Raid Aventura
a semenat sus un canton de Dordonha – en l'ocurréncia en aquel mes d'agost 2012,
lo canton de Salanhac e Eivigas – en organizant la dètz-e-setena edicion d'una fantastica
caça al tresaur, per monts, per vals, per cròsas e per castèls, amb per sol carburant
la fòrça vitala e mentala de 250 joves venguts de França tota, comprés La Reunion.
Quatre jorns d'espròva en VTT, rolèrs, canoè, tiroliana, pont de singe e corsa a
pè, fòra dels grands axes, a la descobèrta del país de las bòrias, aquelas famosas
cabanas bastidas en lausas que fan tot l'embelinament d'aquel ranvèrs del Perigòrd
negre.
Venguts per ganhar, aquels joves convidats a se subrepassar tant dins l'esfòrç coma
dins l'esperit d'equipa an de mai aprés a s'adaptar a tota mena de situacion en
plena natura, tornant trobar entau la pus brava partida de çò que sèm, nòstre costat
animal, aquela connexion a la tèrra, vitala, qu'avèm perduda per una part dins las
vilas e qu'es tant essencial de tornar trobar. Basta, gràcia al Conselh general
de la Dordonha que per lo dètz-e-seten còp debanava jos los pès d'aquela afogada
joinessa lo treslusent tapís verd de nòstre preïstoric Perigòrd, país de l'òme,
lo grand rite de passatge vèrs l'atge adulte s'es un còp de mai realizat, semenant
per totas aquelas vitas de granas de curiositat, d'amistat e de respèct per la tèrra
maira que anóncia un futur ensolelhat.
L'an que ven, en agost 2013, lo Perigòrd Raid Aventura se debanará dins los cantons
de Doma e de Vilafranca-de-Perigòrd. Un còp de mai, lo scenarista e doctor en Preïsòria,
Tierrí Félix, imaginará un scenari sus mesura amb un enigma e un tresaur amagat
d'un biais a far valer totas las riquesas patrimonialas d'aquel terraire.
Se en agost 2013, auretz entre 14 e 16 ans, balancet pas a vos inscriure auprès
del Servici dels Espòrts de la Dordonha per participar a aquela geniala aventura.
Tornaretz trobar lo film d'aquela espròva sul siti del Conselh general de la Dordonha
e l’ensemble de las fotòs aicí sus www.albuga.info atal coma lo
DVD que ven de sortir. .
Sofia Cattoire
|
